Thủ tướng teh đak hơiă kơ teh đak Malaysia iŏk jang kơchư̆k Pơm Kơdră Asean sơnăm 2025; pơma hơdăh Việt Nam gô tơgop ‘lơ̆ng vă sơnăm Asean 2025 gơ̆h iŏk đei jơnei. Ƀok Kơdră vei lăng mŭk drăm teh đak Malaysia tơƀôh đon hơiă hăm tơdrong jang tŏk pran đơ̆ng mŭk drăm teh đak Việt Nam lơ̆m 10 sơnăm âu ki.

Ƀok akhan, ‘nâu jĭ jơnăr tôch lăp vă Malaysia păng Việt Nam hơtŏk tơdrong jang hơdoi, mă loi găh dôm tơdrong jang ‘nao nhen tơplih unh hơyuh rơgoh; pơm tơlĕch tơmam điên tư; vang jang lơ̆m tơdrong pơm tơlĕch păng tĕch mơdro tơmam. Thủ tướng Phạm Minh Chính păng Kơdră tơm vei lăng mŭk drăm teh đak Malaysia oei pơma nuh găh dôm tơdrong lơ̆m tơring păng apŭng plenh teh đei tơrek truh, lơ̆m noh đei tơdrong tơ̆ Biển Đông; drơ̆ng nơ̆r hơtŏk tơdrong jang hơdoi, tơgŭm băl lơ̆m dôm khul jang lơpang.