Tơ̆ jơ sơng, Thủ tướng păng Phŏ Kơdră Anih vei lăng châu Âu (EC) chơt hơiă mơh ƀôh khei ‘năr âu ki, tơdrong pơvei tĕch mơdro – tơmât jên jang Việt Nam - EU đei tơiung ming păng jang tŏk roi ‘lơ̆ng, ưh pơngơ̆t đei lơ tơdrong pơmat tat yoa đơ̆ng jĭ COVID-19 păng tơdrong kơ tĕch trong pơtruh tơmam. EU dang ei jĭ Khul tĕch mơdro hơdai tih mă 4 (đơ̆ng rŏng kơ Trung Quốc, Mi, Hàn Quốc), jĭ anih tĕch tơmam tih mă 3 păng anih răt iŏk tơmam lơ mă 5 đơ̆ng Việt Nam. Oei Việt Nam ‘nŏh jĭ tĕh đak tĕch mơdro hơdai tih hlŏh kơ EU tơ̆ ASEAN.

Thủ tướng tĕh đak pơma hơdăh, Việt Nam ling lang năng EU jĭ 1 lơ̆m dôm Khul jang hơdoi tôch sơđơ̆ng păng gĭt kăl hlŏh lơ̆m trong jang tơbôl đơ̆ng kơdih. Vă tơlĕch jang đei yoa ‘lơ̆ng tơdrong pơvei jang hơdoi Việt Nam – EU, Thủ tướng athei 2 păh hơtŏk tơdrong ăn khul tơƀâp, pơma nuh hăm băl; hơtŏk tơdrong jang hơdoi găh kơmăy kơ mŏk rơgŏh ‘lơ̆ng, tơplih hăm kơmăy sô̆, jang mŭk drăm hơdai, pơjing păng hơmet pơ ‘lơ̆ng trong pơgơ̆r jang, pơtho ăn bơngai jang…