Tơ̆ jơ sơng, 2 păh akhan, Hop akŏm đei tơdrong ‘lơ̆ng gĭt kăl vă hơnơ̆ng tơlĕch jang, pơm hơdăh ‘lơ̆ng tơdrong hlôh vao atŭm kơdră kơpal, dôm trong vă jang pơgơ̆r gĭt kăl đơ̆ng Tổng Bí thư Nguyễn Phú Trọng păng Tổng Bí thư, Kơdră teh đak Trung Quốc Tập Cận Bình, mă loi ‘noh jĭ Tơdrong tơchơ̆t atŭm Việt Nam - Trung Quốc găh tơdrong hơnơ̆ng pơm ‘lơ̆ng hloh dơ̆ng păng hơtŏk tơdrong pơvei jang hơdai gĭt kăl tôm tơdrong, pơjing Tơpôl vang tơgŭm tơ̆ hơnăp kơnh Việt Nam - Trung Quốc đei tơdrong ‘lơ̆ng gĭt kăl kiơ̆ trong “6 hloh”.

Thủ tướng Phạm Minh Chính pơma hơdăh, lơ̆m lơ tơdrong jang kăl kơ jang vă pơm hơdăh ‘lơ̆ng tơdrong hlôh vao atŭm kơdră kơpal, tơdrong Tơchơ̆t atŭm Việt Nam – Trung Quốc ‘noh trong nơnăm ‘noh jĭ tơdrong jang kăl, ‘lơ̆ng păng đei tơdrong tơƀôh, tơdrong ‘lơ̆ng gĭt kăl vă tơƀưh trong jang 2 teh đak mŭk drăm, tơƀưh đơ̆ng Tơdrong jang “2 gơlang, 1 trong ver” kơ Việt Nam hăm tơdrong pơcheh “Trong ver păng Jăl trong” kơ Trung Quốc. Thủ tướng athei ƀơ̆t măt, 2 păh akŏm pơtrŭt jang hơdai tơlĕch jang 03 trong gre treng tơƀưh Việt Nam – Trung Quốc (Lào Cai - Hà Nội - Hải Phòng; Lạng Sơn - Hà Nội; Móng Cái - Hạ Long - Hải Phòng).