Tơ̆ jơ sơng, Thủ tướng sơkơ̆t hơdăh Việt Nam lăng kơjăp păng tơlĕch jang pơtrŭt, pơm kơtang hloh dơ̆ng tơgoăt tơgoăl jang hơdoi gĭt kăl Việt Nam -Italy; chơt hơ iă ƀôh jang hơdoi ƀar teh đak roi năr roi kơtang hloh, hăm đei lơ jơnei ‘lơ̆ng hơ iă lơ̆m rim tơdrong.

Drơ̆ng nơ̆r hăm dôm nơ̆r chă athei đơ̆ng ƀok Attilio Fontana, Thủ tướng athei ƀar păh hơnơ̆ng pơtrŭt kơtang jang hơdoi mŭk drăm, mơdro sa dih băl ‘moi kiơ̆ iung jang kiơ̆ dôm tơdrong lei lăi dih băl păng tơgŭm djru dih băl; Italy atŏk kơtang plôih ‘măng hơnih tĕch mơdro hăm dôm tơmam drăm mă Italy ‘meh vă răt iŏk păng Việt Nam đei nhen tơmam drăm tanh mei, chơkhŏ, tơmam drăm choh jang sa, ka hơdang; atŏk kơtang ăn khul mơdro sa tơƀơ̆p pơma dơnuh dih băl, pơgĕnh ‘lơ̆ng Tơdrong tơchơ̆t EVFTA păng pơtrŭt kơtang kĭ tơchơ̆t Tơdrong pơkăp Vei lăng năng tông tơmơ̆t jên jang Việt Nam-EU (EVIPA).