Thủ tướng hôn bơnê trong pơprŏ jang đơ̆ng grŭp jang tơmơ̆t jên jang lơ̆m tơdrong jang ŭnh jơyuh kơ Việt Nam, pơma hơdăh, Việt Nam xơkơ̆t hơdăh atŏk tơ iung ŭnh hơyuh rơgoh ‘lơ̆ng ‘noh tơdrong jang kăl hloh. Tơbăt Việt Nam xơkơ̆t hơdăh tŏk GDP đơ̆ng 8% lơ̆m sơnăm 2025 păng 2 kơsô̆ lơ̆m dôm sơnăm kơnh hăm tơdrong iŏk yua ŭnh hơyuh kơtang, adoi pơtrŭt kơtang tĕch tơlĕch tơ̆ teh đak đe ŭnh hơyuh ‘lơ̆ng hơ iă, Thủ tướng athei grŭp jang atŏk kơtang tơmơ̆t jên jang, mơdro sa tơ̆ Việt Nam găh atŏk tơ iung kmăi kmŏk ŭnh hơyuh, tơlei ŭnh hơyuh vă tơgop sơđơ̆ng ŭnh hơyuh. 

Kiơ̆ đơ̆ng rŏng ‘noh, Thủ tướng sơng pơma dơnuh hăm yă Nicola Beer, Kơ iĕng Kơdră chĕp pơgơ̆r Hơnih mong jên Tơmơ̆t jang châu Âu, Thủ tướng Phạm Minh Chính bơnê kơchâu Âu păng Hơnih mong jên tơmơ̆t jang châu Âu ling lang yak hơdoi, tơgŭm djru Việt Nam khei năr ou ki, lơ̆m ou đei rim tơdrong vă jang găh tơplih ŭnh hơyuh. Kơ iĕng Kơdră chĕp pơgơ̆r Hơnih mong jên tơmơ̆t jên châu Âu lăp đon kơtang hăm dôm tơdrong chă pơma dơnuh đơ̆ng Thủ tướng, sơkơ̆t hơdăh, Việt Nam jĭ trong atŏk tơ iung hơ iă mă lơ teh đak gơ̆h jang kiơ̆.