Tơ̆ jơ sơng, Thủ tướng athei Khul kơdră, Hơnih tơm Khul lĭnh ƀar teh đak hơnơ̆ng tơlĕch păng jang kiơ̆ ‘lơ̆ng rim Tơdrong Pơkăp, tơdrong Tơchơ̆t, Drơ̆ng mĭnh nơ̆r, păng Nơ̆r pơma pơtôch ƀar păh Kơdră chĕp pơgơ̆r ƀar Đảng, ƀar Teh đak, tơgop hơmet pơ ‘lơ̆ng tơgoăt tơgoăl gĭt kăl Việt Nam - Campuchia. Athei ƀar păh pơtrŭt kơtang jang hơdoi lơ̆m rim tơdrong, lơ̆m au đei mơdro sa, tơmơt jên jang, tơgoăt ƀar tơring jang mŭk drăm, trong nơnăm, pơtho pơjing khul jang, kon pơlei năm ngôi dih băl.

Thủ tướng hơpơi ‘meh vă Khul lĭnh pêng teh đak Việt Nam - Lào - Campuchia hơnơ̆ng tơgoăt tơgoăl mĭnh nơ̆r ƀơ̆r đon, jang hơdoi kơjăp ‘moi kiơ̆ lui dih băl, tơpăt, tơpă, jơnei; iung jang hơdoi tơ iung pơjing trong sơlam teh đak rơngei hiôk hian, tơgoăt tơgoăl, jang hơdoi păng atŏk tơ iung.