Tơ̆ jơ sơng, Thủ tướng sơkơ̆t hơdah: ‘măng năm tơmang đơ̆ng ƀok Prak Sokhonn ‘noh kăp gĭt, tơgop hơtŏk pơ-‘lơ̆ng tơdrong tơbôl kơ 2 Đảng, 2 teh đak. Ƀar ƀok kơdră drơ̆ng nơ̆r akhan Việt Nam păng Campuchia jing 2 teh đak tơjê̆ băl, hlôi atŭm dih băl tơjră ayăt kơnê̆ vă pơrơngei hơdrung hơdrĕch teh đak adoi nhen lơ̆m khei năr tơ-iung pơjing păng vei lăng teh đak; tơbôl tơguăt, jang hadoi, tơgŭm dih băl đơ̆ng 2 Đảng, 2 jơnŭm pơgơ̆r păng kon pơlei 2 teh đak noh kăp gĭt tơpă lơ̆m tơdrong vei sơđơ̆ng tơpôl, hơtŏk tơ-iung kơ rim teh đak.

Ƀar pah sơkơ̆t hơdah, tơdrong tơbôl hlôi tơgop kăp gĭt lơ̆m tơdrong vei sơđơ̆ng chĭnh trĭ, vei sơđơ̆ng tơpôl hơrih xa, hơtŏk mŭk drăm – tơpôl păng hơtŏk anih dơ̆ng lơ̆m apŭng plenh teh kơ rim Đảng, rim teh đak; lui ngeh tơdrong tơbôl teh đak tơjê̆ ‘lơ̆ng rŏ, tơbôl juăt jue jang hadoi tôm tơdrong kơjăp đunh đai đơ̆ng Việt Nam păng Campuchia roi năr roi đei hơtŏk pran, kơyuơ tơdrong pơyua ăn kon pơlei kơ rim teh đak.