Ƀlep lơ̆m jơ ‘năr vang năm Hop akŏm Kơdră kơpal ASEAN-Jơnŭm jang hơdoi tơring Ving (GCC) păng năm tơmang Teh đak pơtao Saudi Arabia đơ̆ng năr 18-20/10, kiơ̆ nơ̆r krao hơvơn đơ̆ng Ƀok pơtao Saudi Arabia Salman bin Abdulaziz Al Saud.

Gơmăng hei (18/10) kiơ̆ jơ tơring, Thủ tướng Chính phủ Phạm Minh Chính hlôi sơng pơma dơnuh hăm kơdră chĕp pơgơ̆r Grŭp jang Ajlan & Bros. Tơ̆ jơ sơng, ƀok Ali AL-Khatib, Kơ iĕng Kơdră chĕp pơgơ̆r Công ty Ajlan & Bros tơbăt, lơ̆m khei năr kơnh Kŏng ty ‘meh vă gô pơih să hloh dơ̆ng jang hơdoi tơmơ̆t jên jang tơ̆ Việt Nam păng athei Khul kơdră teh đak Việt Nam păng rim hơnih tơm pơjing rơvơn hloh dơ̆ng vă Kŏng ty pơ̆ih să tơmơ̆t jên jang lơ̆m Việt Nam. Thủ tướng sơkơ̆t hơdăh, Khul kơdră Việt Nam gô pơkăp gô yak hơdoi, pơjing rơvơn ăn Grŭp jang Ajlan & Bros lơ̆m tơdrong tơmơ̆t jên jang mơdro sa păng pơ̆ih să jang hơdoi hăm rim hơnih mơdro sa tơ̆ Việt Nam păng Thủ tướng ‘mĕh vă sơng pơma dơnuh hăm Kơdră chĕp pơgơ̆r grŭp tơ̆ Ajlan & Bros Việt Nam vă pơjing đei iung jang hloi dôm trong vă tơmơ̆t jên jang mơdro sa kơ Kong ty tơ̆ Việt Nam.