Vă hơtŏk tơdrong pơvei ‘lơ̆ng hơiă đơ̆ng sơ̆ păng tơguăt kơjăp hlŏh dơ̆ng, 2 Thủ tướng Việt Nam păng Timor-Leste drơ̆ng nơ̆r hơtŏk tơdrong pơgơ̆r pơma nuh ăn kuan tih păng rim khul grŭp, tơ̆ hơnăp ‘nŏh jĭ ‘măng vă năm hơpong đơ̆ng Kơdră tơm Timor Leste tơ̆ Việt Nam. 2 Thủ tướng pơma hơdăh hơnơ̆ng tơgŭm ăn băl păng jang hơdoi đei yoa ‘lơ̆ng tơ̆ dôm anih jang, khul grŭp lơ pang lơ̆m tơring păng apŭng plenh tĕh.

Tơ̆ jơ sơng Kơdră WEF Klaus Schwab, Thủ tướng pơma hơdăh, Việt Nam vă hơnơ̆ng vang akŏm, tơgop ‘lơ̆ng ăn dôm tơdrong pơchĕh, tơdrong jang đơ̆ng WEF. Hơpơi ‘mĕh WEF kŭm hăm Việt Nam iŏk pơgơ̆r lơ tơdrong jang akŏm đei lơ bơngai rơgei, bơngai juăt jang mŭk drăm tơm lơ̆m apŭng plenh tĕh păng tơ̆ tơring vă pơma nuh găh dôm tơdrong atŭm, tơgop pơjing jơhngâm pran ‘nao, lơ̆m nŏh đei tơdrong iŏk yoa dôm tơdrong rơgei đơ̆ng khoa hŏk kơmăy kơmŏk vă jang tơiung ming păng jang tŏk mŭk drăm jơ̆p plei tĕh.