Tang măt ăn Kơdră Đảng, Teh đak, Thủ tướng teh đak bơ̆n Phạm Minh Chính kŭp yom pơtruh hăm đe kơdră pơgơ̆r Giáo hội Phật giáo Việt Nam, bơngai kiơ̆ khop Phật lơ̆m păng ‘nguaih kơ teh đak, atŭm hăm tôm bơngai tang măt nơ̆r thơ thâu ‘lơ̆ng hơ-iă hloh; thơ thâu hăm Lêh tih Phật đản Phật lịch 2568 - Dương lịch 2024 kơ Giáo hội Phật giáo Việt Nam gơh đei jơnei tơnăp.

Thủ tướng hơpơi ‘meh păng lui ngeh, Giáo hội Phật giáo Việt Nam pơtoi đei jơnei lơ̆m tơdrong jang khop Phật; tơdrong jang păng hơtŏk kiơ̆ sơkơ̆t “Kơjăp - Tơnăp – Tơguăt tơguăl  - Hơtŏk tơ-iung” mă Hop akŏm bơngai tang măt Phật giáo jơ̆p teh đak ‘măng mă 9 hlôi tơlĕch, pơtho ăn bơngai kiơ̆ khop Phật Việt Nam pơtoi pơm kiơ̆ tơchơ̆t pơm jang “Trŏ êbiang – Kon pơlei - Chủ nghĩa xã hội”, tơgop lơ̆m hloh dơ̆ng ăn tơdrong jang tơ-iung pơjing păng vei lăng teh đak.