Tơdrong tơƀâp jĭ jơnăr vă kơdră chĕp kơ̆l teh đak, dôm anih tơm chă mơ̆ng nơ̆r pơma đơ̆ng anih tĕch mơdro, năng kơdih nhen thoi bơngai pơdro vă chă trong hơmet pơ ‘lơ̆ng dôm tơdrong pơmat tat, tưk tơiung tơdrong jang xa, tĕch mơdro, hăm jơhngâm đon rim anih jang, rim khul grŭp, rim bơngai vang tơgop jơhngâm, adrin jang kiơ̆ hơnăp jang đơ̆ng kơdih vă hơmet pơ ‘lơ̆ng dôm tơdrong pơmat tat, khŏm jang tŏk pran ‘lơ̆ng. Thủ tướng pơma hơdăh, Đảng, teh đak păng kon pơlei hơnơ̆ng jing anih gơnang yoa tôch kơjăp, hơnơ̆ng lui anih tĕch mơdro, bơngai pơdro kơ Việt Nam gô jang tŏk hơdoi hăm teh đak, vang jang đang ‘lơ̆ng tơdrong pơjing păng vei lăng teh đak.

Tang măt ăn Khul kơdră teh đak, Thủ tướng chih răk, pôk pơ ư păng bơnê tơdrong adrin, dôm tơdrong jang đei đơ̆ng anih tĕch mơdro kơ teh đak, tơgop ‘lơ̆ng ăn tơdrong jơnei atŭm kơ teh đak. Thủ tướng athei dôm bơngai tang măt hơlen năng rim tơdrong ƀơm truh trong jang atŏk tơiung anih tĕch mơdro kơ teh đak, dôm tơdrong ‘lơ̆ng păng pơmat tat hrei ‘nâu; dôm trong jang vă iŏk yoa ‘lơ̆ng hlŏh dơ̆ng tơmam drăm, vă anih tĕch mơdro kơ teh đak năm hơdrol, chông hơnhăk, tơƀôh trong chong glung, pơjing jơhngâm pran, tơiung jơhngâm hưch hanh ăn tơpôl bơngai tĕch mơdro pơma atŭm păng hơtŏk tơdrong ‘lơ̆ng vă jang tŏk ‘nao dơ̆ng.