Tơ̆ jơ tơƀâp bơngai tăh hla, bơngai dơ̆ng tang ăn Khul tang măt Quốc hội plt Cần Thơ roi tơbăt dôm tơdrong iŏk đei lơ̆m Hop akŏm mă 6, Quốc hội jăl XV. Kŭm hăm ‘nŏh, bơngai tăh hla plt Cần Thơ tơchĕng ‘lơ̆ng dôm tơdrong mă Quốc hội hlôi iŏk đei lơ̆m hop akŏm âu ki, atŭm hăm ‘nŏh oei tơchĕng ‘lơ̆ng tơdrong pơgơ̆r jang tôch pơneh đơ̆ng Khul kơdră teh đak, Thủ tướng teh đak găh tơdrong jang mŭk drăm lơ̆m teh đak, tang găn kơjă tơmam tŏk, tưk tơiung tơdrong jang mŭk drăm.

Găh noh dơ̆ng, bơngai tăh hla jĭ kon pơlei lui công yăo athei Khul kơdră teh đak, dôm anih tơm, anih jang kơ Trung ương tơmât jên man anih jang, pơm trong vă kon hơ ‘lơ̆p kon pơlei lui công yăo đei tơdrong ‘lơ̆ng jang tŏk mŭk drăm, chĕp kơ̆l pơgơ̆r bơ̆ jang tơplih ming tơđăh ‘long, kon yŏng mă pran vă kon pơlei jang xa đei iŏk yoa lơ; đei trong tơgŭm man anih mong ƀa ăn kon pơlei lơ̆m pơyan kăt yoă, găn ƀiơ̆ tơdrong bơngai pơdro ep kơjă, truh ƀa đei kơjă kơnh tĕch ăn anih tĕch mơdro.