Tơ̆ jơ tơƀâp, Thủ tướng Phạm Minh Chính pơma hơdăh Việt Nam năng kăl păng tơgŭm ăn hơnăp jang tơm đơ̆ng LHQ lơ̆m rim anih vei lăng jơ̆p plei tĕh, vă tơjră hăm dôm tơdrong nol atŭm tôch tih hrei ‘nâu păng Việt Nam pơkăp vă tơgop ‘lơ̆ng hlŏh lơ̆m dôm tơdrong vă pơ ‘nhŏ jang hơdrol đơ̆ng Jơnŭm lơ̆m jăl jang 78.

Kơdră Jơnŭm dôm tĕh đak Liên hợp quốc Dennis Francis tơchĕng ‘lơ̆ng tơdrong pơvei Liên hợp quốc-Việt Nam. Ƀok Dennis Francis akhan, Việt Nam đei lơ tơdrong jơnei găh tơdrong chông hơnhăk kon pơlei jang tŏk klăih đơ̆ng tơnuh hin păng jang atŏk tơiung tĕh đak, gơ̆h roi tơƀôh ăn apŭng plenh tĕh, vă tưk hơtŏk dôm tơdrong jang tơm vă atŏk tơiung pran kơjăp, tơjră hăm tŏ ‘mi kial tơplih, vei lăng sơđơ̆ng phe ƀa tơmam xa. Kơdră Jơnŭm dôm tĕh đak drơ̆ng nơ̆r vă jang hơdoi hăm Việt Nam vă hơtŏk tơdrong pơm kiơ̆ tơdrong Tơchơ̆t đơ̆ng Liên hợp quốc, khôi luơ̆t apŭng plenh tĕh păng trong jang lơ pang.

Lơ̆m ‘măng mă âu mơ̆n, Thủ tướng Phạm Minh Chính hlôi tơƀâp Thủ tướng Thái Lan. 2 păh drơ̆ng nơ̆r vang tơlĕch dôm tơdrong jang hơdoi tơm vă pơm hơtŏk tơdrong pơvei jang hơdoi gĭt kăl Việt Nam-Thái Lan roi đunh roi ‘lơ̆ng păng roi đei yoa.