Tơ̆ jơ tơƀâp hăm Thủ tướng Barbados Mia Mottley, 2 păh drơ̆ng nơ̆r hơtŏk tơdrong pơma nuh hăm băl vă hlôh vao băl hlŏh dơ̆ng. Thủ tướng oei pơma hơdăh, Barbados jĭ tĕh đak đei anih dơ̆ng gĭt kăl lơ̆m tơring Caribe, hơpơi ‘mĕh kiơ̆ đơ̆ng tĕh đak Barbados, Việt Nam gô hơtŏk hlŏh dơ̆ng tơdrong pơvei hăm tơring. Thủ tướng Mia Mottley pơma hơdăh vă pơm gơng tơƀưh lê̆ Việt Nam hơtŏk loi dơ̆ng tơdrong pơvei hăm dôm tĕh đak Caribe.

Tơ̆ jơ tơƀâp 2 pang hăm Thủ tướng New Zealand Chris Hipkins, Thủ tướng Phạm Minh Chính pơma hơdăh, Việt Nam năng kăl păng hơpơi ‘mĕh pơm hơtŏk hlŏh dơ̆ng tơdrong pơvei jang hơdoi gĭt kăl hăm New Zealand. 2 Thủ tướng athei dôm anih tơm, anih jang kơpal đei ƀơm truh, hơtŏk trong tơlĕch jang, pơih xă hlŏh dơ̆ng anih tĕch mơdro ăn tơmam đơ̆ng băl, lơ̆m nŏh đei tơmam đơ̆ng choh jang xa păng năm truh tơdrong pơhnŏng pơm hơtŏk jên tĕch mơdro đơ̆ng 2 pang truh 2 ti USD lơ̆m sơ năm 2024.