Tơ̆ jơ pơma nuh, ƀok Kơdră Woo Won-sik pơma hơdăh, Quốc hội Hàn Quốc vă jang hơdoi kơjăp kŭm hăm Quốc hội Việt Nam tơgŭm ăn Khul kơdră 2 teh đak bơ̆ jang đei yoa ‘lơ̆ng Tơdrong tơlĕch dôm trong jang kiơ̆ tơdrong pơvei ‘nao păng hơtŏk tơdrong jang hơdoi găh tơdrong sơđơ̆ng mŭk drăm, tơguăt khul bơngai jang.

Ƀar păh akhan, tơdrong pơvei Việt Nam-Hàn Quốc hlôi tŏk hrĕnh, đei yoa lơ̆m rim tơdrong jang iŏk đơ̆ng 2 teh đak hơtŏk tơdrong pơvei jing jang hơdoi gĭt kăl tôm tơdrong, hăm lơ tơdrong jang đei ‘lơ̆ng hơiă găh tĕch mơdro, tơmât jên jang, pơvei kon pơlei; drơ̆ng nơ̆r hơtŏk hlŏh dơ̆ng tơdrong jang hơdoi đơ̆ng Quốc hội 2 teh đak tơ̆ hơnăp kơnh. Thủ tướng Phạm Minh Chính athei Quốc hội 2 teh đak jang hơdoi mă kơjăp, tơlĕch jang đei yoa dôm trong jang hơdoi 2 pang păng lơ pang; tơgŭm păng drơ̆ng nơ̆r ăn dôm tơdrong tơgŭm ăn anih tĕch mơdro Việt Nam vang jang xa roi ‘lơ̆ng lơ̆m trong pơtruh tơmam jơ̆p plei teh đơ̆ng dôm anih tĕch mơdro Hàn Quốc.