Pơma tơ̆ jơ tơƀâp, Thủ tướng Phạm Minh Chính pơtruh nơ̆r ‘lơ̆ng hơiă hlŏh đơ̆ng Tổng Bí thư Nguyễn Phú Trọng ăn đĭ đăng thây kô đei măt tơ̆ jơ tơƀâp păng tơƀôh jơhngâm đon ‘mêm bơnê hăm rim jơhnơr thây kô tơ̆ jơ̆p tơring lơ̆m teh đak, hăm nơ̆r jet gia pơma nuh păng nơ̆r pơma ‘lơ̆ng hlŏh.

Bơ̆ jang tơdrong Tơchơ̆t đơ̆ng Hop akŏm mă XIII kơ Đảng păng Tơdrong tơchơ̆t kơsô̆ 29 đơ̆ng Trung ương, Thủ tướng athei anih pơtho pơhrăm hơnơ̆ng bơ̆ jang mă pran ‘lơ̆ng, đei yoa dôm tơdrong jang, trong jang tơplih ‘nao, tôm tơdrong tơ̆ anih pơtho pơhrăm, hơtŏk tơdrong ‘lơ̆ng đơ̆ng pơtho pơhrăm tơ̆ rim jăl hŏk.

Thủ tướng hơpơi ‘mĕh păng lui akhan, rim thây kô hơnơ̆ng adrin, ling lang jing bơngai tơpăt ‘lơ̆ng, pơtho tơƀôh jơhngâm đon, tơdrong rơgei, băt ‘mêm tơdrong jang, ‘mêm kơ bơngai; hơtŏk tơdrong rơgei, đei trong ‘nao mưh pơtho pơhrăm; vă rim jơ hŏk gơ̆h đei yoa, chơt hơiă, vă rim năr hŏk jĭ năr chơt hơiă ling lang.