Tơ̆ jơ tơƀâp, Thủ tướng Phạm Minh Chính pơma hơdăh, Việt Nam ling lang năng kăl tơdrong atŏk tơiung tơdrong pơvei hăm Trung Quốc ‘nŏh jĭ trong jang ưh đei tơplih, tơdrong ‘mĕh vă tôch trŏ, tơdrong rơih jang gĭt kăl, đei pơ ‘nhŏ hơdrol lơ̆m trong jang tơbôl đơ̆ng teh đak Việt Nam. Găh tơdrong pơvei 2 pang Việt Nam - Trung Quốc, Thủ tướng Phạm Minh Chính tơchĕng ‘lơ̆ng tơdrong pơvei đơ̆ng 2 Đảng, 2 teh đak khei ‘năr âu ki hơnơ̆ng đei hơmet ming kơjăp ‘lơ̆ng păng tŏk pran, mât lơ̆m chăl jang tŏk ‘nao hăm đon pơhnŏng pơjing Tơpôl tơgŭm băl ning mônh kơnh kơ Việt Nam - Trung Quốc tôch gĭt kăl kiơ̆ trong "6 tơdrong hlŏh ƀiơ̆”.

Thủ tướng athei 2 păh hơnơ̆ng hơtŏk tơdrong pơma nuh, tơƀâp ăn kuan tih; hơtŏk tơdrong jang hơdoi đei yoa ‘lơ̆ng lơ̆m lơ tơdrong, lơ̆m noh đei pơm trong gre, mă loi ‘nŏh pơ ‘nhŏ jên bơ̆ jang hrĕnh 3 tŏ trong gre treng tơƀưh Việt Nam hăm Trung Quốc (Lào Cai - Hà Nội - Hải Phòng, Lạng Sơn - Hà Nội, Móng Cái - Hạ Long - Hải Phòng) vă tơguăt trong jang mŭk drăm đơ̆ng 2 păh.

Lơ̆m ‘măng bơ̆ jang ƀât vang truh Hop akŏm tih dôm kơdră chĕp kơ̆l BRICS pơih xă tơ̆ Kazan, teh đak Nga mơ̆n, Thủ tướng Phạm Minh Chính oei đei jơ tơƀâp Kơdră tơm teh đak Kazakhstan, Kơdră tơm teh đak Turkmenistan păng Thủ tướng teh đak Ethiopia.