Thủ tướng Phạm Minh Chính pơma hơdăh, Đảng, teh đak, Khŭl kơdră teh đak, Kuôk hô̆i păng kon pơlei Việt Nam ling lang lăng kăl, chĕp vei păng hơdrin pơm ‘lơ̆ng hloh dơ̆ng tơdrong pơvei joăt joe tơgoăt tơgoăl păng jang hơdai tôm tơdrong Việt Nam - Cuba, hơdai tơgŭm tơdrong jang kach mang trŏ ƀlep đơ̆ng kon pơlei Cuba.

Thủ tướng pơma hơdăh dơ̆ng đon tơchĕng kơjăp đơ̆ng Việt Nam tơjră dôm trong jang pơvang kơ̆m mơdro sa hơdrô̆ hăm  Cuba. 2 kơdră chĕp kơ̆l drơ̆ng nơ̆r hơtŏk loi dơ̆ng tơdrong ‘lơ̆ng, pơma dơnuh kơtă tơ̆ dôm hop akŏm lơ pang, jĭ tơdrong joăt joe ‘lơ̆ng hơiă đơ̆ng 2 teh đak. 2 păh drơ̆ng nơ̆r jang hơdai kơjăp hloh dơ̆ng vă pơtrŭt jang hơdai mŭk drăm, tơmơ̆t jên jang, mơdro sa, lơ̆m noh đei jang hơdai choh jang sa, vei sơđơ̆ng phe ƀa tơmam sa.