Ƀlep lơ̆m ‘măng mă au, Kơdră chĕp pơgơ̆r teh đak Việt Nam gô vă tơƀơ̆p pơma dơnuh hăm kơdră chĕp pơgơ̆r teh đak, Kuô̆k hô̆i kơ teh đak Mi, vang năm mĭnh ‘măng pơgơ̆r đei ƀơm truh muk drăm, mơdro sa ƀar păh ƀar teh đak.

Jăl pơdơ̆h jơ̆ng blŭng a kơ Thủ tướng teh đak Phạm Minh Chính tơ̆ teh đak Mi ‘noh San Francisco hăm lơ tơdrong jang git kăl. Mă kăl, Thủ tướng Phạm Minh Chính gô vang năm păng iung pơma tơ̆ Hop akŏm Hơnih mơdro sa Việt Nam - Mi 2023 hăm hơnăn “Hơtŏk loi dơ̆ng tơgoăt tơgoăl Việt Nam - Mi păng rơvơn ăn hơnih mơdro sa kơ ƀar teh đak. Bơngai chĕp kơ̆l Khul kơdră teh đak Việt Nam jei gô vă năm ngôi hăm mĭnh ƀar hơnih mơdro sa jang kmăi kmŏk kơ teh đak Mi tơ̆ Tơring thŭng Silicon; năm ngôi păng bơ̆ jang tơ̆ kŏng ty pơm tơlĕch chip bán dẫn NVIDIA; năm ngôi bơ̆ jang tơ̆ Kŏng ty Meta.

Đơ̆ng rŏng kơ truh tơ̆ plt San Francisco, bang California, Mi, Thủ tướng Phạm Minh Chính đei jơ tơƀâp tôch hơiă hăm bơngai dơ̆ng tang ăn tơpôl bơngai Việt Nam tơ̆ Mi. Tơ̆ jơ tơƀâp, bơngai tang măt ăn kon pơlei tơ̆ âu tơƀôh đon chơt hơiă đơ̆ng rŏng kơ Việt Nam păng Mi jing tĕh đak jang hơdoi gĭt kăl tôm tơdrong hăm băl; mă loi tôch hơiă hăm dôm tơdrong jơnei đơ̆ng jang atŏk tơiung mŭk drăm, tơpôl kơ tĕh đak khei ‘năr âu ki, hơiă hlŏh jĭ tơdrong jang tơiung ming păng jang tŏk mŭk drăm, tơpôl đơ̆ng rŏng kơ jĭ COVID-19, hơnơ̆ng mât jang hơdoi roi ‘lơ̆ng hăm apŭng plenh tĕh, anih dơ̆ng, bưng ai tĕh đak lơ̆m apŭng plenh tĕh roi tŏk kơjung.

Pơma hơdăh, jĭ mĭnh păh tôch gĭt kăl ưh đei tơplĕh lơ̆m tơpôl hơdrĕch bơngai Việt Nam nhen Đảng, tĕh đak chih tơbăt, kon pơlei bơ̆n hơpơi ‘mĕh iŏk đei lơ trong jang tơgŭm ƀĕnh jơhngâm đon ‘lơ̆ng vă kon pơlei vang tơgop roi lơ ƀiơ̆ ăn tơdrong jang tơiung pơjing tĕh đak păng hơmet pơ ‘lơ̆ng tơdrong pơvei Việt Nam – Mi. Thủ tướng Phạm Minh Chính akhan, lơ̆m tơdrong tưk tơiung tơdrong pơvei Việt Nam – Mi, tơpôl bơngai Việt Nam tơ̆ Mi pơma atŭm tơ̆ California pơma hơdrô̆ đei lơ tơdrong tơgop tôch gĭt kăl, Thủ tướng pơma hơdăh, Đảng, tĕh đak ling lang tơrĕk truh tơpôl bơngai Việt Nam tơ̆ tĕh đak đe, hơpơi ‘mĕh truh âu kơnh, khul bơngai tĕch mơdro, dôm bơngai đei hŏk jrŭ, bơngai jang khoa hŏk hơdrĕch Việt tơ̆ Mi hơnơ̆ng yak hơdoi hăm tơdrong jang tŏk đơ̆ng tĕh đak.