Hrei au, Việt Nam đei vă jê̆ 900.000 hơnih mơdro sa, dang 14.400 hơp tak xah păng hloh 5 triu ŭnh hnam mơdro sa. Rim hơnih mơdro sa tơgop hloh 60% GDP, dang 30% akŏp bơngai jang tŏk bŏk jang. ‘Ngoăih jang pơm tơlĕch tĕch mơdro, khul mơdro sa jei hơnơ̆ng vang iung jang rim tơdrong jang xut xa pơngot rơvĕt, tơjur dơnuh, nhă đak chăm kơ tu.

Iung pơma tơ̆ jơ tơƀơ̆p, Thủ tướng Phạm Minh Chính hlôi pơtruh nơ̆r apĭnh jet gia, hôn bơnê, hmach bơnê, chơt hơ iă hloh đơ̆ng Tổng Bí thư Nguyễn Phú Trọng truh hăm đĭ đăng khul mơdro sa, hơnih mơdro sa Việt Nam. Thủ tướng Teh đak sơkơ̆t hơdăh, hơnơ̆ng yak hơdoi hăm khul mơdro sa. Hơnơ̆ng sơđơ̆ng mŭk drăm, tang găn kĕ tŏk jur kơjă, pơtrŭt kơtang atŏk tơ iung, sơđơ̆ng dôm trong jang mŭk drăm. Hơnơ̆ng hơmet pơ ‘lơ̆ng trong jang tơmơ̆t jên jang mơdro sa hơtŏ hơnơ̆ng, ‘lơ̆ng hơ iă, hơtŏ dih băl păng tơpăt; xut hŭt dôm tơdrong găn ga, tơchơ̆t găh pơkăp mơdro sa ưh kơ pă trŏ ƀlep, atŏk kĕ pơjei, atŏk kơtang hơmet pơ ‘lơ̆ng bơ̆ jang pơm hla bơar, tơ iung pơjing tơdrong jang mŭk drăm kơsô̆, Khul kơdră teh đak kơsô̆ gơ̆h hơgei, ‘lơ̆ng hơ iă hăm kon pơlei păng hơnih mơdro sa.