Iung pơma tơgop nơ̆r tơ̆ hop akŏm, Thủ tướng Phạm Minh Chính pơma hơdăh, Việt Nam tŏk bŏk vei kơjăp sơđơ̆ng mŭk drăm tih, vei lăng hơtŏk kơjă lơ, vei sơđơ̆ng hre teh đak, iŏk lơ jên jang, hre teh đak đe, hre Khŭl kơdră teh đak lơ̆m kơ sô̆ ăn phep; rơngei, pơm tơm kơdih hơgăt teh đei vei kơjăp, sơđơ̆ng tơpôl, sơđơ̆ng tơdrong arih sa tơpôl, vei lăng cham char hơtŏ hơnơ̆ng đei vei sơđơ̆ng; tŭn pran tơdrong jang tang găn sa pơgơ̆m pơjĭp; tơdrong jang tơbôl iŏk đei lơ jơnei ‘lơ̆ng.

Tơ̆ hơnăp kơnh, găh tơdrong hơgăt, Thủ tướng pơma hơdăh, tơdrong hơgăt gĭt kăl: hơdrin truh sơnăm 2030 (tơbăt 100 sơnăm pơjing Đảng) jĭ teh đak tŏk bŏk hơtŏk tơiung, đei kơmăy kơmŏk ‘nao, iŏk yua jô̆ păh lăp lơ; truh sơnăm 2045 (tơbăt 100 sơnăm pơjing Teh đak) jĭ teh đak hơtŏk tơiung, đei iŏk yua lơ. Sơnăm 2024 đei băt hơdăh ‘noh jĭ sơnăm tŏk hrĕnh, ‘lơ̆ng gĭt kăl lơ̆m tơdrong bơ̆jang kiơ̆ jơnei Trong tơlĕch jang 5 sơnăm 2021-2025 păng tơdrong jang 10 sơnăm 2021-2030, lơ̆m noh, pơtôch 2024 athei ‘lơ̆ng hloh kơ sơnăm 2023 nhen athei đơ̆ng Tổng Bí thư Nguyễn Phú Trọng.