Khei năr âu ki, Anih jang tang măt hơnơ̆ng tơlĕch tơgŭm kon pơlei Việt Nam vă kon pơlei sơđơ̆ng jang pơm jang hơrih xa, tơgop hơtŏk mŭk drăm tơpôl kơ teh đak Lào păng tơgop ‘lơ̆ng ăn pơlei pơla, teh đak, ăn tơdrong tơbôl Việt Nam - Lào. Pơma ah jơ tơƀơ̆p, Thủ tướng Phạm Minh Chính hmach bơnê kơ dôm anih jang tang măt tơ̆ teh đak Lào hlôi găn lơ tơdrong tơnap tap, keh đang tơnăp sơnong jang mă Đảng păng Teh đak pơjao, tơgop hơtŏk jang tơbôl kơjăp ‘lơ̆ng, tơguăt tơguăl kăp gĭt păng jang hadoi tôm tơdrong Việt Nam - Lào.

Thủ tướng ră hơdah, tơdrong tơbôl Việt Nam - Lào, tơbôl jang chĭnh trĭ noh mă tơm, atŭm hăm noh athei hơtŏk pran jang hadoi gah mŭk drăm, jang hadoi gah pơtho pơhrăm, pơtho bơngai jang păng dôm tơdrong jang nai, tơgop hơtŏk pơ-‘lơ̆ng tơdrong tơbôl Việt - Lào roi năr roi hơtŏk lơ̆m rim tơdrong jang, pơyua kăp gĭt ăn kon pơlei 2 teh đak.