(Anih jang kơmăy kơmŏk Halal nŏh jĭ akŏm đĭ đăng dôm anih jang kơmăy pơyoa ăn tơdrong ‘mĕh vă đơ̆ng bơngai răt tơmam kiơ̆ lui Hồi giáo nhen tơmam xa păng đak nhă, pơgang, phơ̆ng, hơle, hơnam, hơbăn ao …).  Tơdrong ‘nâu ‘măng mă blŭng đei pơgơ̆r lơ̆m teh đak, tih hlŏh găh Halal hăm tơdrong vang akŏm đơ̆ng lơ kơdră chĕp kơ̆l dôm Anih tơm, anih jang kơpal, dêh char, plt kŭm hăm 600 ‘nu bơngai tang măt vang truh hop akŏm păng vang hôp trư̆k tuyê̆n.

Pơma tơ̆ hop akŏm, Thủ tướng Phạm Minh Chính roi tơbăt dôm tơdrong ‘lơ̆ng đơ̆ng Việt Nam lơ̆m tơdrong atŏk tơiung anih jang Halal tơ̆ Việt Nam. Thủ tướng pơma hơdăh, jang hơdoi kơ anih halal jĭ 1 lơ̆m dôm tơdrong jang tơm ‘nao mưh jang hơdoi mŭk drăm hăm apŭng plenh teh. Thủ tướng krao hơvơn tơpôl bơngai tĕch mơdro, mă loi jĭ dôm anih tĕch mơdro, bơngai pơdro đơ̆ng teh đak đe hơnơ̆ng tơmât jên jang xa tơ̆ Việt Nam kiơ̆ jơhngâm đon “3 hơdai" ‘nŏh; Vang mơ̆ng păng hlôh vao dôm tơdrong pơmat tat, pơlong nol; vang roi tơbăt trong vă jang păng tơdrong bơ̆ jang mưh atŏk tơiung anih jang halal kŭm nhen dôm anih pơvih ăn halal; vang bơ̆ jang, vang xa yoa, vang jang khŏm đei păng vang jang tŏk hơdoi.