Pơma tơ̆ âu, tang măt ăn Khul kơdră teh đak, Thủ tướng Phạm Minh Chính chih răk, pôk pơ ư păng hơiă hăm dôm tơdrong jơnei gĭt kăl mă Đảng ƀô̆, khul kơdră pơgơ̆r, khul linh păng kon pơlei dêh char Đồng Nai hlôi iŏk đei lơ̆m khei ‘năr âu ki. Thủ tướng akhan, Tơdrong tơproh trong jang đơ̆ng dêh char Đồng Nai hlôi đei hơmet tôch hơlen, lăp ‘lơ̆ng, trŏ khoa hŏk; đei chih pơjing ‘moi kiơ̆ lơ tơdrong ‘lơ̆ng pha ra băl, tơgĕch iŏk dôm tơdrong pran, kŭm nhen hơmet pơ ‘lơ̆ng dôm tơdrong tam mă hơiă đơ̆ng dêh char.

Tơdrong tơproh trong jang hlôi tơƀôh hơdăh đon tơchĕng, trong vă jang, đon pơhnŏng jang tŏk hăm dôm tơdrong kăl; đei hloi trong pơgơ̆r jang, tơdrong tơgŭm đunh đai păng anih vă jang tŏk ‘nao, pơjing đei kơjă ‘nao ăn Đồng Nai lơ̆m tơdrong jang atŭm kơ dôm dêh char, plt lơ̆m teh đak. Thủ tướng athei dôm anih tơm, anih jang kơpal tơ̆ Trung ương hơnơ̆ng jang hơdoi vă bơ̆ jang đei yoa ‘lơ̆ng tơdrong tơproh trong jang kơ dêh char Đồng Nai; kŭm hăm dôm tơring tơ̆ âu akŏm jơhngâm pran atŭm bơ̆ jang đei yoa ‘lơ̆ng tơdrong tơproh trong jang âu.