Pơgê ‘năr 9/10, Hop akŏm tih ASEAN ‘măng mă 44, 45 păng dôm Hop akŏm đei ƀơm truh đei pơih pơgơ̆r tih tơ̆ Hnam hôp kơ teh đak Lào, hăm tơdrong vang akŏm đơ̆ng kơdră chĕp kơ̆l dôm teh đak ASEAN, Timor-Leste kŭm hăm bơngai tang măt ăn lơ anih jang, khul grŭp lơ̆m apŭng plenh teh păng tơ̆ tơring. Thủ tướng Phạm Minh Chính chĕp kơ̆l khul tang măt ăn Việt Nam vang truh hop akŏm. 

Pơma pơih blŭng hop akŏm, Tổng Bí thư, Kơdră teh đak Lào Thoong-lun Xi-xu-lít pơma hơdăh, ưh kơđunh dơ̆ng, ASEAN gô akŏm đei tôm đĭ đăng teh đak Đông Nam Á hăm tơdrong Timor-Leste vang mât jang tôm tơdrong lơ̆m ASEAN, tơƀôh hơdăh tơdrong pran ‘lơ̆ng đơ̆ng tơring, hơdai hăm ‘nŏh pơih đei lơ trong vă jang hơdoi hăm dôm teh đak.

Hăm hơnăn “ASEAN: Hơtŏk tơdrong tơguăt hơdai păng jang tŏk kơdih”, dôm tơdrong pơ ‘nhŏ hơdrol, tơdrong pơcheh lơ̆m sơnăm pơm Kơdră đơ̆ng teh đak Lào vang tơgop bơ̆ jang đei đon pơhnŏng atŭm pơjing 1 tơpôl ASEAN mât hơdai păng jang tŏk pran ƀiơ̆. Đơ̆ng rŏng kơ lêh pơih blŭng, Thủ tướng Phạm Minh Chính kŭm hăm kơdră chĕp kơ̆l dôm teh đak ASEAN păng Timor-Leste vang hôp atŭm tơ̆ Hop akŏm tih ASEAN, pơma nuh găh dôm tơdrong jang hơdoi lơ̆m ASEAN păng đơ̆ng ASEAN hăm dôm teh đak nai.