Kơdră jang lơ̆m Anih tơm Chinh trĭ, Thủ tướng tĕh đak ƀok Phạm Minh Chính, Kơdră chĕp kơ̆l Khul vei lăng Pơjei pôk hơpăh kơ Trung ương pơgơ̆r hop akŏm păng đei ƀai iung pơma tôch gĭt kăl. Pơma tơ̆ jơ pơm lêh, đei 700 ‘nu bơngai tang măt ‘nŏh jĭ bơngai jang rơgei – đei pơ ư̆ nhen thoi dôm pơkao ‘lơ̆ng rŏ lơ̆m tơdrong pơjei băl ‘mêm tĕh đak, jĭ dôm bơngai đei đon ‘lơ̆ng, jang tơnăp, dơ̆ng tang ăn kơ triu ‘nu bơngai păng khul grŭp jang rơgei găh rim tơdrong tơ̆ jơ̆p tơring lơ̆m tĕh đak;

Thủ tướng lui, oei đei lơ bơngai nai jang rơgei tơnăp ‘lơ̆ng hơnơ̆ng tơgop jơhngâm, đon rơgei ăn tĕh đak găh rim tơdrong, đơ̆ng đĭ đăng kon pơlei jô̆ hloi kon pơlei lơ̆m tĕh đak păng oei xa tơ̆ tĕh đak đe hai. Thủ tướng hơpơi ‘mĕh, dôm bơngai jang rơgei, ưh gơ̆h lăng pơhơi, lăp đon kơdih mă athei hơnơ̆ng chĕp vei jơhngâm đon jang tơnăp, hơnơ̆ng adrin jang tŏk, plang lơ hlŏh dơ̆ng ăn tơpôl, ăn tĕh đak păng ăn kon pơlei.