‘Năr brei (19/8), Thủ tướng Phạm Minh Chính vang Hop akŏm pơtôch sơnăm hŏk 2023 -2024 păng tơlĕch hơnăp jang sơnăm hŏk 2024-2025 yua đơ̆ng Anih tơm vei lăng găh pơtho pơhrăm pơgơ̆r kiơ̆ trong trực tuyến đơ̆ng anih pơih tivi tơm Hà Nội hăm 63 dêh char, pơlei tơm găh Trung ương. Tang măt khŭl kơdră teh đak, Thủ tướng Phạm Minh Chính chih iŏk, lăng ‘lơ̆ng, pôk pơ ư păng hmach chơt hơiă dôm jơnei ‘lơ̆ng iŏk đei đơ̆ng anih jang pơtho pơhrăm lơ̆m sơnăm hŏk âu ki, tơgop lơ̆m jơnei atŭm kơ teh đak khei ‘năr âu ki.

Găh 1,2 hơnăp jang, trong jang tơm Thủ tướng athei Anih tơm vei lăng găh pơtho pơhrăm, dôm anih tơm, anih jang, tơring kiơ̆ hơnăp jang, gơh jang akŏm tơlĕch jang kiơ̆; tơtom roi tơbăt ăn kơdră gơh jang hăm dôm tơdrong ưh kơ gơh jang. Mă loi ‘noh hơmet ăn ‘lơ̆ng dôm tơdrong ăn sơnăm hŏk ‘nao; pơgơ̆r ‘lơ̆ng lêh mơ̆t hŏk blŭng ‘năr  5/9 vă jê̆ truh, pơm tơdrong hiôk chơt, ‘nă hal ăn sơnăm hŏk ‘nao, mă loi ‘noh jĭ hơtŏk ‘lơ̆ng khŭl thây kô pơtho roi ‘năr roi ‘lơ̆ng hloh, pơm lăp hăm ‘meh vă yan âu.