Hop akŏm roi tơbăt hơdăh Tơdrong Proh chĕng hơmet păng pơtrŭt tơmơ̆t jên jang dêh char Long An jĭ 1 tơdrong jang kăl đei tơdrong ‘lơ̆ng gĭt kăl hăm tơdrong tơlĕch jang bơ̆jang kiơ̆ proh hơmet dêh char, hơvơn lơ jên, tơmam, sơng đei tơmơ̆t jên jang, pơtrŭt hơtŏk tơiung mŭk drăm tơpôl kơ Long An tơ̆ hơnăp kơnh. Tơ̆ hop akŏm, Kơdră tơm tơlĕch nơ̆r sơkơ̆t păng tơmơ̆t jên jang Nguyễn Chí Dũng hlôi pơjao Tơdrong Proh chĕng hơmet dêh char sơnăm 2021 - 2030, lăng truh sơnăm 2050 ăn kơdră chĕp kơ̆l dêh char Long An.  

Pơma tơ̆ hop akŏm, Thủ tướng Phạm Minh Chính pơma hơdăh, Long An akŏm lơ tơmam ‘lơ̆ng vă hơtŏk tơiung mŭk drăm tơpôl hrĕnh păng kơjăp, jĭ hơnih năm truh hơiă hăm dôm bơngai tơmơ̆t jên jang lơ̆m teh đak păng apŭng plĕnh teh. Dêh char Long An kăl kơ hơdrin truh sơnăm 2030, jĭ hơnih hơtŏk tơiung mŭk drăm ‘lơ̆ng, đei yua, kơjăp kơ tơring păih pơbăh. Kŭm lơ̆m ‘năr 25/7, Thủ tướng Phạm Minh Chính kŭm hăm khŭl bơ̆jang kơ Khŭl kơdră teh đak năm hơlen lăng tơdrong jang pơm trong ver 3 pơlei tơm HCM klĕch Long An. Tơdrong ming man đang trong ver 3 pơlei tơm HCM hăm tơdrong tơm tơƀưh dôm dêh char, pơlei tơm tơring mŭk drăm tơm păih pơ băh, pơjing anih kơdrơ̆m ‘nao, kơjăp, tơgop pơm hơtŏk tơiung mŭk drăm - tơpôl kơ teh đak.