Pơgê brei (16/9), Thủ tướng teh đak Phạm Minh Chính chĕp kơ̆l khŭl tang măt Việt Nam rŏk trong vang năm akŏm Jơnŭm kơ chơ Trung Quốc- ASEAN (CAEXPO) păng Hop akŏm tih Mơdro sa - tơmơ̆t jên jang  Trung Quốc-ASEAN (CABIS) ‘măng mă 20 tơ̆ pơlei tơm Nam Ninh, Quảng Tây, Trung Quốc đơ̆ng ‘năr 16 truh ‘năr 17 khei 9 sơnăm 2023 kiơ̆ drơ̆ng nơ̆r krao hơvơn đơ̆ng Khŭl kơdră teh đak Cộng hòa nhân dân Trung Hoa.

‘Nâu jĭ tơdrong jang gĭt kăl oei lơ̆m tơdrong jang tơbăt 20 sơnăm pơjing tơdrong pơvei Jang hơdai gĭt kăl Trung Quốc - ASEAN, tơbăt 20 sơnăm CAEXPO păng CABIS. Jơnŭm kơ chơ đei 04 tơdrong jang tơm păng 01 hop akŏm iĕ. Lei lăi nhen dôm ‘măng Jơnŭm kơchơ hơdrol ki, sơnăm ‘nâu, khŭl anih mơdro sa đơ̆ng Việt Nam vang akŏm Jơnŭm kơchơ hăm pơgơ̆r tih hloh ASEAN (hăm 250 kơdeng tơmam, să 5.000 m²).