Khei năr ou ki, bơ̆ jang tơlĕch jang kiơ̆ Tơdrong vă jang 06 kơ pơlei tơm Hà Nội iŏk đei jơnei hơ iă, mă kăl ‘noh lơ̆m bơ̆jang chĕp pơgơ̆r, pơrô̆ jang păng pơgơ̆r jang kiơ̆ đei Hơnih Đảng, Hơnih vei lăng kon pơlei, rim hơnih bơ̆ jang kơ pơlei tơm Hà Nội tơlĕch jang kơtang.

Iung pơma tơ̆ Hop akŏm, Thủ tướng pơma hơdăh, vă jang keh đang rim trong jang atŏk tơ iung mŭk drăm-tơpôl kơ Hơnih tơm truh sơnăm 2025, mă kăl pơtrŭt kơtang tơplih kơsô̆ păng tơlĕch jơnei Tơdrong vă jang 06, trong tơlĕch jang ‘noh tôch trăp trĭn. Thủ tướng Teh đak athei rim kơdră pơm hơtŏk jơhngơ̆m đon bơ̆ jang, “ ‘nĕ pơma ưh, ‘nĕ pơma khan tơnap, ‘nĕ pơma khan gơ̆h mă lei  ưh kơ jang”, jang kiơ̆ kơjăp “Đĭ pơma tơ-‘ngla jang hloi, đĭ jang ‘noh mă keh đang”, “lăp pơma trong vă jang, ưh kơ pơma vă kơdŭn”. Hà Nội ‘noh kăl jing tơring pơm jŭk yŭk trong hơlou lơ̆m bơ̆ jang tơplih ‘nao păng atŏk tơ iung mŭk drăm kơsô̆, tơpôl kơsô̆, kon pơlei kơsô̆, lăng truh tơpôl gơ̆h hơgei.