Iung pơma tơ̆ jơ pơma dơnuh, Thủ tướng Teh đak Phạm Minh Chính krao hơvơn rim teh đak kăl iung jang kơtang, kon jên jang lơ, iung jang kơtang hloh dơ̆ng rim tơdrong jang, tơdrong vă jang hơdăh, tơpă, jơnei, kơ yuơ xut hŭt pơngot rơvĕt tơjur dơnuh ưh khan lăp tơdrong ‘mêm mơnat dih băl, mă lei oei jing tơdrong kăl, đei ƀơm kơtă truh sơđơ̆ng rơngei hiôk hian, sơđơ̆ng dơ̆ng kơjăp lơ̆m teh đak, sơđơ̆ng lơ̆m plei teh. Thủ tướng teh đak pơma kiơ̆ nơ̆r Ƀok Hô hlôi pơma, “Tơgoăt tơgoăl mĭnh nơ̆r ƀơ̆r đon ‘noh pran kơtang hloh”, păng jơhngơm đon ‘noh sơkơ̆t hơdăh Việt Nam pơkăp hôn bơnê trong jang lơ pang, tơgoăt tơgoăl apŭng plĕnh teh kơjăp iăp kơtang, tơgop kơtang, jơnei lơ̆m tơdrong hơdrin atum tơ iung pơjing mĭnh apŭng plĕnh teh pă đei pơngot rơvĕt dơnuh hin đunh đai, mĭnh apŭng plĕnh teh kơjăp ‘lơ̆ng.