Lơ̆m 30 sơnăm au ki, tơgoăt tơgoăl Việt Nam hăm ADB ling lang hơmet pơ ‘lơ̆ng, atŏk tơ iung; mă kăl ‘noh tơdrong tơgŭm djru tơtom, tơpă đơ̆ng ADB ‘măn ăn kơ Việt Nam lơ̆m tơdrong jang tơjră tang găn jĭ hơbuh Covid-19, pơtrŭt kơtang hơmet pơ ‘lơ̆ng mŭk drăm-tơpôl.

Thủ tướng Phạm Minh Chính sơkơ̆t hơdăh, Khul Kơdră Teh đak Việt Nam ling lang lăng ADB ‘noh mĭnh lơ̆m dôm hơnih jang hơdoi atŏk tơ iung gĭt kăl hloh, ‘lơ̆ng hơ iă hloh; tơbăt đơ̆ng rŏng hloh 35 sơnăm tơplih ‘nao, Việt Nam tim lăh đei mŭk drăm pran kơtang, hơnih dơ̆ng păng tơdrong lui yom đơ̆ng apŭng plĕnh teh nhen hrei au. Lơ̆m tơdrong iŏk đei jơnei kơ Việt Nam đei tơdrong jang hơdoi, tơgŭm djru jơnei đơ̆ng ADB. Akhan, đơ̆ng rŏng 30 sơnăm tơgoăt tơgoăl jang hơdoi Việt Nam – ADB roi năr roi atŏk tơ iung ‘lơ̆ng hơ iă hloh găh tôm tơdrong, Thủ tướng athei lơ̆m chăl hle, jang hơdoi ƀar păh Việt Nam – ADB kăl tơplih ‘nao, akŏm ăn tơmơ̆t jên jang atŏk tơ iung, lơ̆m hơnih kăl hloh; trong jang pơm hla bơar au to kăl hơmet pơ ‘lơ̆ng hloh dơ̆ng; hăm trong jang hle vă hơnhăk đei iŏk jơnei hloh dơ̆ng.