Pơgê 25/6 (kiơ̆ jơ tơring) tơ̆ Đại Liên, Trung Quốc, Thủ tướng Phạm Minh Chính hlôi đei ƀai iung pơma gĭt kăl tơ̆ ‘Măng pơgơ̆r pơih blŭng đĭ đăng Hop akŏm rim sơnăm dôm bơngai iung jang hơdrol ‘măng mă 15 kơ Hop akŏm Mŭk drăm apŭng plĕnh teh tơ̆ Đại Liên (WEF Đại Liên) kŭm hăm Thủ tướng Trung Quốc Lý Cường, Kơdră tơm teh đak Ba Lan Andrzej Duda, Kơdră Hop akŏm Mŭk drăm apŭng plĕnh teh Klaus Schwab. Vang iung pơma tơ̆ ‘Măng pơih blŭng, Thủ tướng Phạm Minh Chính lăng ‘lơ̆ng hơnăp jang tơm đơ̆ng mŭk drăm Trung Quốc hăm jang mŭk drăm tŏk jơ̆p plei teh. Jĭ teh đak tơ jê̆, “kông tơ til kông”, “đak krong tơtil đak krong”, vang pơjing “Tơpôl tơgŭm băl tơ̆ hơnăp kơnh Việt Nam - Trung Quốc đei tơdrong ‘lơ̆ng gĭt kăl”, Việt Nam chơt hơiă tơ̆ hơnăp tơdrong hơtŏk tơiung kơ Trung Quốc.

Việt Nam lui ngeh Trung Quốc hơnơ̆ng hơtŏk hơnăp jang, pơtrŭt dôm tơdrong ‘lơ̆ng jang tŏk ‘nao; pơtrŭt pran kơtang tơdrong jang lơ pang, hơtŏk loi dơ̆ng tơgoăt pôm nơ̆r ƀơ̆r đon, jang hơdai apŭng plĕnh teh, vei lăng cham char rơngei, sơđơ̆ng, jang hơdai, hơtŏk tơiung hơnŭk hơnoa tơ̆ tơring păng lơ̆m apŭng plĕnh teh. Mĭnh mŭk drăm Trung Quốc hơdrin kơdih, pran kơtang, mơ̆t jang hơdai jrŭ să gô hơnhăk ăn dôm tơdrong ƀơm ‘lơ̆ng ăn apŭng plĕnh teh.