Hop akŏm đei pơgơ̆r tơ̆ Đại học RMIT, pơlei tơm Melbourne, bang Victoria, yua đơ̆ng Anih tơm Tơlĕch nơ̆r sơkơ̆t păng Tơmơ̆t jên jang păng Anih jang tang măt Việt Nam tơ̆ Australia jang hơdai hăm Anih Mơdro sa păng Tơmơ̆t jên jang Australia, Anih jang tang măt Australia tơ̆ Việt Nam pơgơ̆r hăm tơdrong vang akŏm đơ̆ng lơ lap tơpôl mơdro sa 2 teh đak. Tơ̆ âu, dôm bơngai tang măt đei roi tơƀôh găh tơmam ‘lơ̆ng, hơnih tơmơ̆t jên jang, tĕch mơdro đơ̆ng Việt Nam păng Australia; mơ̆ng roi tơbăt găh tơdrong jang păng trong tơlĕch jang tơmơ̆t jên jang, tĕch mơdro đơ̆ng dôm anih mơdro sa 2 teh đak.

Hơlen lăng tơdrong hơtŏk tơiung đơ̆ng anih tĕch mơdro jên hu tơ̆ Việt Nam; Hơlen lăng găh jang hơdai tơmơ̆t jên jang lơ̆m tơdrong jang choh jang sa kơmăy kơmŏk ‘nao đơ̆ng anih mơdro sa Việt Nam tơ̆ Australia. Mă kăl ‘noh, Hop akŏm ‘măn jơ năr vă dôm bơngai mơdro sa tơlĕch dôm nơ̆r apĭnh păng đei kơdră chĕp kơ̆l dôm anih tơm, anih jang 2 păh tơl tơblang hơdăh dôm tơdrong bơngơ̆t truh nhen: Tơdrong jang hơtŏk tơiung mŭk drăm kơ 2 teh đak; dôm tơdrong jang tơgŭm hơdrol; trong jang tơgŭm; pơm hla ar, anih jang kăl, bơngai jang... Hơdai hăm ‘noh, anih mơdro sa 2 păh vang pơma dơnuh vă jang hơdai tơmơ̆t jên jang, tĕch mơdro.

Pơma tơ̆ hop akŏm, Thủ tướng athei lơ̆m jang hơdai, 2 păh akŏm pơtrŭt dôm tơdrong ‘lơ̆ng hơtŏk roi tơbăt nhen tơmơ̆t jên jang, tĕch tơ̆ teh đak đe, răt yua, tơplih kơsô̆, tơplih rơgoh. Bơngai chĕp kơ̆l Khŭl kơdră teh đak kŭm ‘meh vă 2 păh hơnơ̆ng tŭn pran jang hơdai tơƀơ̆p pơma dơnuh đơ̆ng kon pơlei, tơmang lăng, joh ayŏ păng pơtho pơhrăm kiơ̆ lơ̆m hơtŏk pran tơdrong ‘lơ̆ng hơiă đơ̆ng 2 hơdrĕch hơdrŭng.