Pơma tơ̆ Hop akŏm, Thủ tướng Phạm Minh Chính tơbăt ‘nao đei jơ pơma đam tôch kơ jơnei hăm Kơdră tơm teh đak Brazil Luiz Inácio Lula da Silva, 2 păh hlôi drơ̆ng nơ̆r hơtŏk tơdrong pơvei 2 teh đak tŏk Jang hơdai gĭt kăl. Thủ tướng tơbăt Việt Nam vă jang sơng đei tơmơ̆t jên jang đei rơih iŏk dôm tơdrong jang kơmăy kơmŏk ‘nao, đei kơjă tŏk lơ, đei tơdrong păr ang, tơgoăt hăm anih mơdro sa lơ̆m teh đak; tơgŭm hơdrol dôm tơdrong jang găh dôm tơdrong jang khoa hŏk kơmăy kơmŏk, tơplih ‘nao pơcheh hơgei.

Thủ tướng akhan 2 păh kăl kơ pơtrŭt jăh pơgơ̆r pơma đam tơdrong tơchơ̆t mơdro sa hiôk hian đơ̆ng Việt Nam păng Grŭp Anih tĕch mơdro sa atŭm Nam Mỹ, tơchơ̆t pơtrŭt păng vei lăng tơgŭm tơmơ̆t jên jang, tơchơ̆t găh asong hla ar mơ̆t lĕch păng Brazil set hơlen drơ̆ng ăn tơdrong tơchơ̆t mŭk drăm tĕch mơdro đơ̆ng Việt Nam. Thủ tướng athei dôm anih mơdro sa tơgŭm vă pơm hơnih tơmơ̆t jên jang hiôk, ‘lơ̆ng, hơtŏk tôch ai tơmam đei ‘lơ̆ng.