Pơma tơ̆ hop akŏm, Thủ tướng Phạm Minh Chính hôn bơnê kơ Australia roi tơbăt hơdăh tơmơ̆t dơ̆ng 222,5 triệu đô la Australia ăn jang hơdai hăm dôm teh đak tơring Mekong, pơjing Anih mong jên tơmơ̆t jên jang đei kơjă 2 ti đô la Australia păng dôm tơdrong pơcheh nai vă pơtrŭt mơdro sa păng tơmơ̆t jên jang hăm dôm teh đak ASEAN tơ̆ hơnăp kơnh.

Pơma dơnuh găh dôm trong vă jang hơtŏk tơiung pơvei tơ̆ hơnăp kơnh, 2 păh drơ̆ng nơ̆r kăl kơ hơdrin pơm tơplih pran kơtang lơ̆m jang hơdai mŭk drăm, mă loi ‘noh jĭ mơdro sa păng tơmơ̆t jên jang ‘moi kiơ̆ tơlĕch jang jơnei Tơdrong tơchơ̆t mơdro sa hiôk hian ASEAN-Australia-New Zealand ‘nao đei tưk hơtŏk păng tơdrong Tơchơ̆t jang hơdai mŭk drăm tôm tơdrong tơring (RCEP); hơdai hăm tŭn pran jang hơdai lơ̆m dôm tơdrong jang ‘nao nhen tơplih ‘nao pơcheh, mŭk drăm kơsô̆, tơplih rơgoh, tơplih ŭnh hơyuh, mơdro sa điện tử, tơgoăt hơdai, hơnhăk dôm tơdrong jang hơdai jing dôm tơdrong ‘lơ̆ng jang tŏk ‘nao ăn tơdrong pơvei mŭk drăm 2 pah.