Hop akŏm yua đơ̆ng Anih tơm tơlĕch nơ̆r sơkơ̆t păng tơmơ̆t jên jang, Anih jang tang măt Việt Nam tơ̆ Thổ Nhĩ Kỳ păng Jơnŭm mŭk drăm jang tơbôl Thổ Nhĩ Kỳ vang pơgơ̆r. Tơ̆ Hop akŏm, tơpôl mơdro sa Việt Nam - Thổ Nhĩ Kỳ đei roi tơƀôh găh tơmam ‘lơ̆ng, ‘meh vă jang hơdai tơmơ̆t jên jang, tĕch mơdro đơ̆ng 2 păh; tơroi băl ƀai hŏk jơnei lơ̆m jang hơdai, tơmơ̆t jên jang. Iung pơma tơ̆ Hop akŏm, Thủ tướng Phạm Minh Chính tơbăt: Việt Nam tŏk bŏk akŏm 3 tơdrong ‘lơ̆ng gĭt kăl, ‘meh vă jang hơdai lơ̆m dôm tơdrong jang mŭk drăm kơsô̆, tơplih rơgoh, mŭk drăm ‘lơ̆ng tôm, mŭk drăm hơgei, mŭk drăm vang tơgŭm băl; iŏk khoa hŏk kơmăy kơmŏk, tơplih ‘nao pơcheh hơgei ‘noh jĭ tơdrong ‘lơ̆ng hơtŏk tơiung ‘nao. Việt Nam pơm tơdrong hiôk hloh ăn dôm anih mơdro sa tih, kơmăy kơmŏk ‘nao, đei hlôh vao vei lăng, lơ̆m noh đei anih mơdro sa Thổ Nhĩ Kỳ năm tơmơ̆t jên jang, tĕch mơdro tơ̆ Việt Nam.

Lơ̆m ‘năr 30/11 mơ̆n Thủ tướng Phạm Minh Chính sơng Kơdră  tơm vei lăng jên hu păng Kơdră tơm vei lăng Kơmăy kơmŏk Thổ Nhĩ Kỳ păng truh năm lăng, bơ̆jang hăm Grŭp jang gre păr Apôlô Thổ Nhĩ Kỳ (TAI) - mĭnh lơ̆m dôm grŭp jang kơmăy kơmŏk khŭl lĭnh tih hloh kơ Thổ Nhĩ Kỳ; năm lăng Anih ‘măn răk tơmam drăm so Anatolia, Thổ Nhĩ Kỳ.