Thủ tướng pơma hơdăh hăm tơdrong bơngơ̆t truh pơgơ̆r đơ̆ng Đảng, teh đak, Khŭl kơdră teh đak, tơdrong hơdrin đơ̆ng rim kơdră Đảng păng khŭl kơdră, kon pơlei dêh char Kiên Giang, pơlei tơm Phú Quốc, tơdrong mŭk drăm tơ pôl kơ Phú Quốc hlôi đei tơdrong hơtŏk tơiung ‘lơ̆ng, tôm tơdrong.

Vă Phú Quốc hơtŏk tơiung hrĕnh, kơjăp, tơ̆ hơnăp kơnh, Thủ tướng athei: hơdrin pơjing Phú Quốc jing anih kơdrơ̆m pơvih pơvăn, tơmang lăng cham char bri brăh ‘lơ̆ng, tơmang lăng đak dơsĭ, jĭ hơnih kăl kơ hơrih, achon đak dơ sĭ ‘lơ̆ng kơ tơring păng apŭng plĕnh teh; sơkơ̆t hơdăh hơnăn tơmang lăng Việt Nam lơ̆m hla kak tơmang lăng apŭng plĕnh teh. Phú Quốc kăl, hơnơ̆ng tơplih ‘nao đon tơchĕng hơtŏk tơiung hăm jơhngơ̆m đon “jên jang pơtơm đơ̆ng đon tơchĕng; tơdrong ‘lơ̆ng pơtơm đơ̆ng tơdrong tơplih ‘nao; jơhngơ̆m pran pơtơm đơ̆ng kon pơlei, anih mơdro sa”.