Dêh char Ninh Bình jĭ dêh char oei tơ̆ găh Pơbăh tơring tơmăn đak krong Hồng, đei hơnih jang gĭt kăl pơđĭ găh chĭnh trĭ, mŭk drăm păng khŭl lĭnh - sơđơ̆ng; jĭ ‘măng mơ̆t păih Pơbăh kơ tơring găh Tu. Thủ tướng tơƀôh hơdăh, tơdrong tơm akŏm găh proh hơmet dêh char truh sơnăm 2030, Ninh Bình jĭ dêh char đei ƀôh. Truh sơnăm 2035, dêh char Ninh Bình jing pơlei tơm găh Trung ương hăm tơdrong ‘lơ̆ng anih kơdrơ̆m so gĭt kăl, pơlei tơm pơcheh hơgei; mĭnh anih tơiung pơjing tơdrong jang sa tơplih ‘nao hơgei.

Vă jang kiơ̆ ‘lơ̆ng tơdrong hơgăt ‘noh Thủ tướng athei, dêh char Ninh Bình kăl kơ lăng kăl, akŏm bơ̆jang kiơ̆ hơvơn păng iŏk yua rim kon jên jang, hơtŏk ‘lơ̆ng lơ̆m dôm tơdrong jang tŏk ‘nao nhen mŭk drăm rơgoh, mŭk drăm kơsô̆, mŭk drăm đei hơnơ̆ng, mŭk drăm vang tơgŭm, mŭk drăm hơgei, tơjră hăm tơplih tŏ ‘mi kial, hơtŏk tơiung kơjăp ‘lơ̆ng.