Tơ̆ hop akŏm, dôm anih mơdro sa hlôi mơ̆ng kơdră chĕp kơ̆l dôm anih tơm, anih jang roi tơƀôh găh tơmam ‘lơ̆ng jang hơdai đơ̆ng 2 teh đak, trong jang tơgŭm sơng đei tơmơ̆t jên jang đơ̆ng 2 păh. Dôm anih mơdro sa Saudi Arabia lăng ‘lơ̆ng hơnih tơmơ̆t jên jang, tĕch mơdro roi ‘năr roi đei tơplih ‘lơ̆ng tơ̆ Việt Nam; hơdai hăm chă hơlen lăng găh tơdrong hiôk jang hơdai tơmơ̆t jên jang, tơgoăt hơdai tĕch mơdro, tơroi dôm nơ̆r apĭnh hăm Khŭl kơdră teh đak, dôm anih tơm anih jang 2 teh đak păng tơlĕch dôm tơdrong jang hơdai hơdăh hăm ‘meh vă pơm đei dôm kơjă kăp gĭt ‘nao păng tơdrong ‘lơ̆ng jang tŏk ‘nao vă pơtrŭt, hơtŏk tơdrong pơvei jang hơdai mŭk drăm 2 teh đak găh tơdrong ‘lơ̆ng păng yak mơ̆t jrŭ tơ̆ hơnăp kơnh.

Pơma tơ̆ hop akŏm, Thủ tướng Phạm Minh Chính tơroi rơđăh, Việt Nam gô pơm hơnih hiôk ăn dôm anih tĕch mơdro bơ̆jang đei yua, sơđơ̆ng, kơjăp, đunh đai tơ̆ Việt Nam. Thủ tướng ‘meh vă Việt Nam păng Saudi Arabia gô jang hơdai kơjăp, vang hơdai băl jing gơng tơƀưh vă anih mơdro sa 2 păh ưh khan lăp vang jang tĕch mơdro dih băl mă oei pơih să pơ đĭ tơ̆ tơring tơmam ‘lơ̆ng, să tih ASEAN păng GCC.

Lơ̆m ‘năr 19/10 mơ̆n, Thủ tướng Phạm Minh Chính sơng Kơdră vei lăng mŭk drăm păng trong bơ̆ jang kơ tĕh đak Saudi Arabia păng Kơdră tơm vei lăng Khul bơngai jang păng atŏk tơiung tơpôl Saudi Arabia. Tơ̆ jơ tơƀâp, Thủ tướng Phạm Minh Chính hơiă hăm dôm tơdrong jơnei tih tên đơ̆ng Saudi Arabia găh tơdrong tơlĕch lơ trong jang păng atŏk tơiung dôm anih jang mŭk drăm ‘ngoăih kơ đak dâu, hơtŏk tơdrong tơmât yoa khoa hŏk, kơmăy kơmŏk, tơplih ‘nao rơgei, pơ ‘nhŏ ăn tơdrong jang tŏk rơgŏh ‘lơ̆ng, pran kơjăp, vă bơ̆ jang đei tơdrong jang tơm “Trong jang truh sơnăm 2030”.

Pơma hơdăh tơdrong pơvei jang hơdoi Việt Nam – Saudi Arabia oei rok trong tŏk tôch ‘lơ̆ng păng đei lơ tơdrong ‘lơ̆ng vă jang hơdoi dơ̆ng, Thủ tướng tĕh đak athei 2 tĕh đak hơtŏk tơdrong tơguăt trong jang hơdoi, vang pơgơ̆r dôm tơdrong tơlĕch trong tĕch mơdro, tơmât jên jang, lơ̆m nŏh pơ ‘nhŏ ăn dôm tơdrong jang nhen unh hơyuh, jên hu, hơtŏk tơdrong jang hơdoi găh dôm tơdrong jang ‘nao nhen pơm tơlĕch tơmam Halal, tơplih hăm kơmăy sô̆…