Tang măt kơdră chĕp kơ̆l Đảng, teh đak, Thủ tướng Phạm Minh Chính hmach thơ thâu, bơnê kơ dôm bơngai, khŭl grŭp lơ̆m păng ‘ngoăih teh đak hlôi vang jang păng iŏk đei tơmam hơpăh lơ̆m teh đak găh kơtơ̆ng ang tơbôl ‘măng mă IX. Thủ tướng pơma hơdăh, 110 ƀai đei rơih iŏk, pôk hơnăn năr ‘nâu tơpă jing dôm ƀai ‘lơ̆ng, đei păr ang lơ, jĭ ƀai chih ƀĕnh jơhngơ̆m hơdrin, tơnăp păng tơdrong ‘mêm hăm teh đak Việt Nam đơ̆ng pơ đĭ bơngai pơcheh lơ̆m păng ‘ngoăih teh đak.

Vang pơlong lơ̆m teh đak găh kơtơ̆ng ang tơbôl ‘măng mă IX, Radiô nơ̆r pơma Việt Nam hlôi iŏk đei 3 jơnei hơpăh ‘noh: 1 Jơnei Mônh ăn ƀai “Tết Nguyên đán hơnhăk nơ̆r pơma gĭt kăl găh kơ jă kăp gĭt joh ayŏ Việt Nam" đơ̆ng grŭp chih: Thu Hoa, Hồng Vân, Ánh Huyền, Ngọc Anh, Nhật Quỳnh, Phương Khanh - Khŭl jang tơbôl (VOV5); 1 jơnei Ƀar ăn ƀai: Re jơva nuih mơng “Hà Nội - Điện Biên Phủ tơ̆ rơvơ̆ng plĕnh” đơ̆ng grŭp chih: Nguyễn Vũ Duy, Nguyễn Thị Mai Hồng, Nguyễn Hồng Nhung - Khŭl kơtơ̆ng ang (VOV1) păng 1 jơnei Pêng ăn ƀai: Tơgoăt tơgoăl yak hloh ơh sơ ‘ngon đơ̆ng bơngai chih: Phan Ngọc Thạch - Anih radiô nơ̆r pơma Việt Nam tơ̆ Ai Cập.