Ƀlep ƀơ̆t vang truh hop akŏm tih Grŭp dôm teh đak jang kơ măy kơmŏk pơdrŏng (G7) pơih să păng bơ̆jang tơ̆ Nhật Bản, kơsơ̆ 19/5, tơ̆ Hiroshima, Thủ tướng Phạm Minh Chính hlôi vang truh pơm lêh roi tơbăt trong păr tơpăt mă blŭng đơ̆ng Việt Nam păng Hiroshima păng jing trong păr mă 8 tơƀưh 2 teh đak đơ̆ng Anih jang gre păr Vietjet. Trong păr Hà Nội – Hiroshima pơtơm pơvih pơ văn ăn tơ moi đơ̆ng ‘năr 19/07/2023 hăm 2 ‘măng păr vih vơ̆t 1 giĕng lơ̆m dôm Năr Pêng păng Năr pơh. Thoi noh, dang ei, Vietjet đei dôm trong păr tơpăt đơ̆ng Hà Nội, pơlei tơm Hồ Chí Minh truh tơ̆ Tokyo, Osaka, Nagoya, Fukuoka păng lơ ‘măng păr truh tơ̆ Niigata, Shizuoka, Fukushima.

Kiơ̆ kơ ‘noh, Vietjet hơtŏk dôm ‘măng păr Việt Nam -Nhật Bản tŏk 58 ‘măng păr vih vơ̆t lơ̆m 1 giĕng. Hăm dôm trong păr tơ păt ‘nao đơ̆ng Vietjet, hơmĕng tơdrong jang hơdai đơ̆ng Hiroshima păng Việt Nam gô hơdrin hloh dơ̆ng lơ̆m lơ tơdrong jang, đei hlôi tĕch mơdro păng tơmang lăng.