Iung pơma tơ̆ hop akŏm, pơma hơdăh hơnăp jang gĭt kăl đơ̆ng gre păr lơ̆m hơtŏk tơiung mŭk drăm hrei ‘nâu, Thủ tướng Phạm Minh Chính akhan tơdrong rơngei păng jang hơdai oei jing trong jang tơm, yua đơ̆ng noh mŭk drăm, mơdro sa păng tơmơ̆t jên jang gô hơnơ̆ng hơtŏk tơiung; ƀơ̆t mŭk drăm hơtŏk tơiung ‘noh ‘meh vă răt yua, năm vih vơ̆t, tơmang lăng đơ̆ng kon pơlei gô lơ hloh.

Lơ̆m tơdrong ‘noh, tơƀơ̆p băl đơ̆ng kon bơngai pơm hơnăp jang gĭt kăl păng ‘meh vă năm vih vơ̆t hăm trong gre păr gô roi tŏk. Thủ tướng Phạm Minh Chính ‘meh dôm anih jang gre păr kơ Việt Nam jang hơdai, pơjei băl hơtŏ hơnơ̆ng, mă loi ‘noh jĭ khei ‘năr dang ei - ƀơ̆t 2 teh đak gô hơtŏk tơdrong pơvei Jang hơdai gĭt kăl tôm tơdrong, lơ̆m noh đei tơdrong jang hơdai pơtho bơngai jang đei hơnăp jang gĭt kăl.