Pơma dơnuh găh dôm tơdrong pơcheh vă tơgŭm dôm kŏng ti pơjing tơdrong jang sa păng bơ̆jang tơplih ‘nao pơcheh hơgei tơ̆ Việt Nam, Thủ tướng teh đak tơbăt, Việt Nam bơ̆jang kiơ̆ hrơ̆ch 5 grŭp trong jang găh chih pơkeh tơdrong jang tơgŭm, pơtrŭt tơplih ‘nao pơcheh hơgei păng pơjing tơdrong jang sa; tơlĕch jang dôm tơdrong jang kơ teh đak găh tơgŭm hơnih pơjing tơdrong jang sa tơplih ‘nao hơgei, tơgŭm hŏk tro, sinh viên pơjing tơdrong jang sa, tơdrong jang tơgŭm anih mơdro sa tơplih kơsô̆, tơdrong jang Long nol Tơplih ‘nao pơcheh hơgei Việt Nam.

Thủ tướng Phạm Minh Chính kŭm pơma dơnuh lơ tơdrong ƀơm truh trong tơlĕch jang hơtŏk tơiung păng tơdrong hiôk ăn khŭl mơlôh Việt Nam lơ̆m dôm tơdrong jang ‘nao iung nhen tơdrong gơh hơgei pơm kơdih, chíp bán dẫn, hla ar chih răk tih; găh tơdrong rơ hiŭng rơhiăng jơ̆p plei teh păng dôm tơdrong đei ƀôh jơ̆p plei teh nai.