Hăm dôm tơdrong ‘mêm mơ mat hloh, tơdrong vang tơgŭm, mơnat gĭt kăl hloh, Thủ tướng gơih truh đe ƀak si, bơngai jang lơ̆m Anih jang găh Pham - ƀet tơmơ̆t pham Trung ương, đe mĕ ƀă păng mă loi ‘noh jĭ đĭ đăng đe mon nơ̆r apĭnh jet gia păng nơ̆r hnmach thơ thâu ‘lơ̆ng hơiă hloh ƀlep ƀơ̆t năr Tết Trung thu sơnăm 2023.

Hmach kơ đe mon ling lang pran jăng grăng hơkâu, hiôk hian; ‘meh đe y ƀak si, vei lăng dôm hơioh jĭ nhen kon mon kơdih kâu. Tơ̆ hơnăp kơnh, Thủ tướng ‘meh vă đe mon hơioh athei ling lang hiôk hơmet jĭ jăn, hơdrin yak hloh mơmat tat, yak truh 1 khei ‘năr tơ̆ hơnăp kơnh ‘lơ̆ng hơiă. Đe y ƀak si, ŭnh hnam păng tơpôl gô ling lang oei hơdai, ‘mêm kơ eng, tơgŭm đe mon. Thủ tướng ‘meh vă đe mon păng bơngai ŭnh hnam ling lang hiôk chơt, đei đon lui gô đei hơmet ‘lơ̆ng tơ̆ âu.