Tơdrong ming man jăl trong tih Châu Đốc-Cần Thơ-Sóc Trăng hơtaih hloh 188km, găn 4 dêh char, pơlei tơm, asong ăn 4 tong gre yak hadoi, hăm kơsô̆ jên asong ming man pơhlom 45 rơbou tih hlj. Đei pơtơm ming man ah khei 6/2023, kơchĕng gô keh đang ah sơnăm 2026 păng tơmơ̆t iŏk yua tôm jăl trong ah sơnăm 2027. Thủ tướng teh đak bơ̆n Phạm Minh Chính akhan, trong tih Châu Đốc - Cần Thơ - Sóc Trăng keh đang hrôih dang yơ noh hiôk ăn teh đak păng Tơring tơmăn đak krong Cửu Long dang noh.

Kơyuơ noh, dôm dêh char Tơring tơmăn đak krong Cửu Long, mă kăl noh dôm dêh char, pơlei tơm An Giang, Hậu Giang, Sóc Trăng, Cần Thơ athei mă tơnăp hăm tơdrong jang, gơnơm hăm tôm anih jang chĭn trĭ, khul linh vang pơm jang, ming man khŏm mă keh đang păng đei jơnei tơnăp hloh. Rim anih iŏk ming man athei hơbĕch hloh lơ̆m tơdrong tơlĕch jang.