Đơ̆ng rŏng tơmơ̆ng tơroi păng tơgop nơ̆r, pơkăp pơtôch tơdrong hop akŏm, Thủ tướng Phạm Minh Chính ră hơdăh, hơkŏk unh hơyuh kơ teh đak noh măh axong ăn tơdrong kăl, ưh đei kơƀah đunh khei năr. Mă lei, tơdrong axong unh hơyuh hơbŏ gô kơƀah lơ̆m tŏ xĕt năr đơ̆ng dang ei truh năr 25/5, kơyuơ tô̆ pơđang lang xă. Thủ tướng pơgơ̆r dôm tơdrong jang tơ̆ anăp hăm pơkăl đơ̆ng dang ei truh năr 25/5, ưh đei lê̆ kơƀah unh hơyuh pơm jang, tĕch pơdro păng 'măn yua. Kiơ̆ kơ noh, Anih jang Ngar – Tơmo gĭt Việt Nam păng Anih tơm Kŏng ti Đŏng Ƀăk axong tôm ngar ăn dôm hnam kơmăi pơm tơlĕch unh hơyuh yua ngar lơ̆m teh đak; iŏk yua tơnăp dơnâu đak pơm tơlĕch unh hơyuh; tơlĕch pơma đam kiơ̆ kơjă oei yua hăm dôm unh hơyuh pơm tơlĕch đơ̆ng kial, đơ̆ng jơ̆ng 'năr hlôi keh đang axong ming man păng gơh pơm tơlĕch unh hơyuh kơtă hrau hăm unh hơyuh teh đak.