‘Măng hop akŏm đei bơ̆jang kiơ̆ trong kơtă hơdai hăm trực tuyến đơ̆ng anih pơdăh tơvi kơ Anih bơ̆jang Khŭl kơdră teh đak hăm 33 dêh char, pơlei tơm găh Trung ương tŏk bŏk đei dôm tơdrong jang gĭt kăl teh đak, tơm ‘noh tơdrong jang trong nơnăm. Pơma tơ̆ ‘măng hop akŏm, Thủ tướng Phạm Minh Chính tơbăt, jên tơmơ̆t jên jang ăn tơdrong jang trong nơnăm đei lơ lơ̆m jên tơmơ̆t jang teh đak, yua thoi noh, tơdrong pơgơ̆r tơlĕch jên jang ƀlep, hơtŏk ‘lơ̆ng tơlĕch jên jang, tơgop jang tŏk ‘noh jĭ tôch kơ gĭt kăl.

Thủ tướng athei hăm jơhngơ̆m đon jang tơnăp, dôm bơngai jang lơ̆m Anih pơgơ̆r jang rim tơring, rim anih jang vei lăng tơdrong jang, bơngai iŏk jang vang mơ̆t jang ‘lơ̆ng yua kơ đei yua ăn teh đak, hơdrĕch hơdrŭng, bơ̆jang kơtang, “ưh kơ pơma ưh, ưh kơ pơma hơnat, ưh kơ pơma đei mă ưh kơ jang”.