Tơ̆ hop akŏm, Anih tơm tơlĕch nơ̆r sơkơ̆t tơmât jên jang roi tơbăt tơdrong Tơchơ̆t đơ̆ng Thủ tướng tĕh đak găh pơjing Khul pơgơ̆r jang kơ Tơring tĕh tơmăn đak krong Hồng. Kiơ̆ kơ ‘nŏh, Khul pơgơ̆r jang kơ tơring đei chih hơdăh ưh kơsĭ 1 anih jang hanh chĭnh mă lei đei trong pơgơ̆r jang đei yoa ƀiơ̆ vă hơlen năng, tơchơ̆t dôm tơdrong gĭt kăl tơ̆ tơring, tơgop sek tơlang dôm tơdrong ưh kơlăp mă 1 dêh char lơ̆m tơring ưh gơ̆h sek tơlang, hơdai hăm ‘nŏh sek tơlang dôm tơdrong tam mă đei drơ̆ng nơ̆r dăh mă hlŏh tơdrong gơ̆h jang đơ̆ng dôm anih tơm, anih jang kơpal păng dêh char, plt lơ̆m tơring.

Tơring tĕh tơmăn đak krong Hồng đei chih tơlĕch trong jang tŏk jing tơring tŏk hrĕnh, pran kơjăp, lơ̆m noh anih tơm Hà Nội “Gơ̆h hơgei – ‘Lơ̆ng rŏ”, jing anih tơm, jơhngâm pran vă atŏk tơiung tơring păng lơ̆m tĕh đak, adrin vă hơtŏ hăm anih tơm dôm tĕh đak lơ̆m tơring. Tơ̆ hop akŏm âu, kơdră chĕp kơ̆l dôm Anih tơm, anih jang kơpal, tơring tơrang pơma nuh păng chih pơjing trong tơprŏh trong jang tơ̆ tơring tĕh tơmăn đak krong Hồng đơ̆ng 2021-2030, trong vă jang truh sơnăm 2050 hăm đon tơchĕng kiơ̆ trong jang đunh đai, pơm ‘lơ̆ng ăn tơdrong jang hơdoi, pơgơ̆r jang hrơ̆ch ‘lơ̆ng, đei yoa păng kơjăp đunh.