Pơma tơ̆ hop akŏm, Thủ tướng Phạm Minh Chính pơma hơdăh, đơ̆ng hloh jĭt sơnăm pơđĭ khŭl jang chĭnh trĭ mĭnh jơhngơ̆m mơ̆t jang, asong tŏk iŏk jên tơgŭm tơpôl hlôi jing 1 hơnih hơdăh păng jing 1 anih tơm lơ̆m tơdrong jang tơgŭm tơ jur dơnuh hin, vei sơđơ̆ng tơdrong arih sa tơpôl, pơm lăp hăm ‘meh vă đơ̆ng kon pơlei, mă loi ‘noh jĭ bơngai dơnuh hin păng bơngai mơmat tat lơ̆m tơpôl.

Tơ̆ hơnăp kơnh, Thủ tướng athei Anih mong jên tơgŭm tơpôl kăl kơ hơnơ̆ng băt hơdăh asong tŏk iŏk jên tơgŭm tơpôl ‘noh jĭ trong jang gĭt kăl vă bơ̆jang kiơ̆ dôm trong jang, tơdrong tơgŭm, tơdrong hơgăt, hơnăp jang đơ̆ng Đảng, teh đak găh hơtŏk mŭk drăm năm hơdai hăm bơ̆jang kiơ̆ hơtŏ băl lơ̆m tơpôl, bơ̆jang kiơ̆ dôm tơdrong jang tơm teh đak kŭm nhen hơtŏk tơiung mŭk drăm tơpôl kơ teh đak.